老鋪情

今日係油麻地食魚蛋粉，叫魚片牛筋米；點知阿姐聽到魚片筋腩米，都好有埋牛腩，所以無更正阿姐 。碗粉份量細，一邊食一邊諗係咪要叫多碗淨丸之時，突然驚醒銀包好似無錢。

打開銀包，由上到下摷勻都係得$32.5，張單$35，無錢學乜人食筋腩米。死火，點算好呢。到底留低乜野做抵押好呢？身份證？電話？

銀包有張美心$100 現金券，都好喎；但佢會唔會懷疑係假呢。腦裏頓時出現了很多方案，同阿姐無限個反應。

差不多食完，醜婦終需見家翁。心裏準備好對白，當想轉身去埋單，見到有個阿Sir企係 counter, 個人即刻縮一縮。原來阿Sir 等緊外賣，都係等埋阿Sir 走我先出去，我驚佢捉我去差館。

阿Sir 終於走咗， 去到counter硬著頭皮同姐姐講：「唔好意思，唔記得撳錢，我爭兩個半。我放低…」，我都未講完，阿姐氣定神閒，若無其事講：「得啦，下次經過俾啦」。緊張的反而係我，「唔得，唔得！我轉頭去撳錢，過嚟俾」
阿姐依然好閒咁話, 唔使！

我唔理佢，即刻去撳錢。3分鐘後去還錢，阿姐一副嫌棄樣，非常勉強地收下我的$2.5。

阿姐的反應沒有一個是我想像的，我驚訝之餘反而感到小店街坊情的溫暖同可貴。我要表揚下油麻地夏銘記魚蛋粉的姐姐！大家都要去支持下，繼續支持本土地道小店，除了品嚐到地道的潮州味外，還有一份濃厚的人情味。